بحث
  • 7mama

تكلفة الشحن من اللى يحددها ….التاجر أم المندوب ؟؟

سؤال مهم ...تكلفة الشحن من اللى يحددها ….التاجر أم المندوب ؟؟

لو تابعنا أى طلب شحن معروض فى أى مكان بيبقى تقريبا كالأتى :

مطلوب مندوب توصيل من منطقة (أ) ...إلى منطقة (ب) ...الدفع المقدم (مثلا 400) ...تكلفة الشحن (مثلا 50)

خلينا فى الأول نقول إن مافيش ثوابت ….وكل طلب وليه ظروفه ...لأن مش كل تكلفة التوصيل واحدة ...والموضوع فى النهاية عرض وطلب.

التجارعادة بيبقى فيه تفاصيل مش واضحة ليهم ...فيه أماكن الوصول ليها مش سهل وبتستهلك وقت ومصاريف أكتر …..وفى أيام التحرك فيها مش سهل بسبب الزحام ….وفيه أوقات الظروف المناخية بتبقى عائق لسهولة الحركة بالنسبة للمندوب.

بعض التجار بيفترض إن سعر التوصيل لازم يبقى ثابت ...وهنوضح حالا ليه الكلام ده مش دقيق!

خلينىا الأول نطرح وجهة نظرنا

إحنا شايفين إن التاجر يحدد تكلفة الشحن بناءا على ظروف الطلب بتاعه والمندوب ممكن يراجعه لو ناوى ينفذ الأوردر

يعنى ايه الكلام ده ؟

يعنى أنا كتاجر مثلا عايز أوصل أوردر فى نفس اليوم علشان أكسب العميل بتاعى ..فأنا محتاج مندوب يستلمه ويوصله فى نفس اليوم ….وعلى الأغلب المندوب اللى هيقبل ممكن يكون مافيش أوردرات تانية فى طريقه...يعنى هيتحرك بطلب واحد فقط ….. يبقى من الطبيعى انى أزود فى السعر المقترح للتوصيل علشان أشجعه يقبل وتتم البيعة وأنا المستفيد فى النهاية.

أو مثلا الأوردر فى مكان بعيد أو زى مابعض المندوبين بيقولو أن فيه أوردرات بتروح أماكن مش سهل الوصول ليها ...ده أكيد مش زى مثلا أوردر من مدينة نصر للتجمع !

مثلا ...فيه أوردر كان على تطبيق حمامة يوم العاصفة داخل القاهرة...كان ثمنه 320 والتاجر عرض للشحن 170 جنيه…. لأن هو كان لازم يوصل لعميل قبل سفره فى المساء.

وبالتالى مافيش حاجة سعرها ثابت ...كل طلب وليه ظروفه.

التاجر لما بيعرض سعر للتوصيل بيعتمد على مصلحته فى إتمام البيعة ...لو عرض سعر مش مناسب هو اللى خسران .


ولو عرض سعر مشجع هو المستفيد فى النهاية...وهيشجع المندوب إنه يقبل الطلب... وفى النهاية المندوب المستفيد.

مافيش مانع إن المندوب يراجع السعر مع التاجر ويوضحله ليه السعر ممكن يختلف….بس عادة التجار بيبقى عندهم احساس ان المندوب دايما بيزود السعر ….ودى مش حقيقة غالبا ….لأن المندوب شخص بيسعى على رزقه ومش من مصلحته يرفض الطلب طالما مش هيخسره ويضيع وقته من غير فائدة.

فى تطبيق حمامة ...بعض التجار بيعرضو سعر للشحن بيبقى من وجهة نظرنا قليل جدا ومختلف كتير عن الأسعار المتعارف عليه….كتير منهم بيفكرو إن ده أبلكيشن عام وعليه مندوبين كتير وأكيد فيه منهم هيقبل بالسعر القليل!

كمان المندوب يقدر من خلال الأبلكيشن يقترح السعر المناسب ليه حتى لو مختلف عن السعر المعروض….وده حقه ….وهو أقدر الناس على تقدير الخدمة اللى هيقوم بيها ...والتاجر له أن يقبل أو لا يقبل.

الحاجة التانية إن عرض التاجر للسعر القليل للشحن بيبقى فى أكثر الأحيان دليل على ضعف البيزنس بتاعه وعدم إهتمامه إن الأوردر يوصل لعميله فى وقت مناسب .

كمان استغلال الظروف واللعب على وتر احتياج المندوبين للعمل بنعتبره سقطة أخلاقية فى المقام الأول ونتمنى ألا يقع فيها أحد من التجار.

نتفهم إن ممكن البعض يكون ميعرفش السعر المناسب فعلا علشان كده إحنا أضفنا فى التطبيق تقدير لسعر الشحن للأماكن المختلفة وهيبقى أمام التاجر وهو بيعرض طلب الشحن.

نسأل الله التوفيق للجميع.



419 مشاهدة1 تعليق